Tajuk Rencana Mabasa Bali:Tembang Nyihnayang Zaman

Tajuk rencana puniki dados ka-copy nanging elingang nagingin alamat blog puniki

Tembang Nyihnayang Zaman

      Kawentenan tembang sane ten bermoral ring masyarakat sekadi mangkin patut pisan kauratiang. Mangkin tembang-tembang sane ten becik punika sampun lumrah lan kasenengin olih sekancan soroh masyarakat. Unsur-unsur seksualitas, kekerasan, lan sekancan kadiatmikan sareng ngewarnain tembang-tembang hiburanne. Napi malih kawentenan tembang-tembang sane tetojonnyane nyebarang ajaran sesat Illuminati masih sareng dados pikobet sane patut polih uratian. Minab hiburan masyarakate mangkin sampun akeh madue dosa.

      Tembang sane ten becik puniki nyihnayang zamane sane kebaos Globalisasi. Minab jakti zamane mangkin sampun aor tanpa wates. Kawentenan sekancan piranti teknologi sane canggih punika kasalahgunayang lan ngawinang dampak negatif ring sekancan widang kehidupan rumasuk widang hiburan. Yening unduke niki ten polih penanganan, minab pacang wenten degradasi moral sane sayan nglimbak.

      Sastra tembang becik pisan anggen natasin pikobet niki. Mangkin perlu utsaha-utsaha mangda eksistensi sastra tembang sekadi geguritan, kidung, lan kekawin mangda tetep lestari. Nanging ring sajeroning ngemarginin utsaha punika pacang ngemolihang pikobet saantukan iraga pacang ngelawan arus Globalisasi. Olih awinan nika patut pesan mangda ngemarginin utsaha sane setinut ring penglimbakan zamane sekadi mangkin. Utsaha punika minakadi ring media online, sane mangkin akeh wenten website maupaya nglestariang budaya sekadi sastra tembang. Utsaha puniki patut pisan lan kebaos efektif.

      Siosan teken ngasorang tembang ten becik, tetujon nglestariang sastra tembang maka utsaha nukung program pemerintah ngewujudang pendidikan sane berbasis karakter bangsa. Manut saking http://www.menkokesra.go.id, Kemdikbud ngewetuang 18 nilai sane patut kaplajahin anggen pedoman ngemarginin pendidikan berbasis karakter bangsa lan berbudaya. Sastra tembang sekadi tembang sane nyuaraang kaluihan puniki pastika maguna pesan malarapan antuk utsaha ngemargiang pendidikan berbasis karakter bangsa lan berbudaya punika. Olih awinan asapunika sastra tembang patut pesan kalestariang.

Opini Mabasa Bali: Melajah Metembang Malih!

Opini puniki dados ka-copy nanging elingang nagingin alamat blog puniki

Melajah Metembang Malih!

Olih

I Made Wisnawa

         

          Jakti saja baos anake mangkin yening aab Globalisasi puniki wantah aab sane aor tanpa wates. Uratiang tiang mangkin dampak negatif Globalisasi sampun ngeranjing ring sekancan wewidangan kehidupan I Manusa. Degradasi moral mangkin sampun dados pikobet sane lumrah lan sayan nglimbak. Napike niki pikenoh utama saking panglimbakan IPTEK? Napi iraga sane iwang ring sajeroning nganggen? Utawi menawi iraga nenten siap tekening kemajuan zaman?

          Dampak  negatif globalisasi punika masih sampun wenten ring widang hiburan. Unsur-unsur kadiatmikan makin akeh kapolihang ring tembang-tembang sane dados konsumsi masyarakat. Seksualitas, kekerasan, ajaran sesat, SARA, lan sane siosan mangkin ngewarnain panglimbakan musik. Para musisine minab wantah ngarsayang keuntungan kemanten tanpa mikayunin dampak negatif sane pacang katrima olih sang sane mirengang. Jinah niki sane ngandika.

          Yening iraga maosang dewek dados manusa sane manut tekening sesana, pastika iraga pacang pilih-pilih ring sajeroing matingkah. Napike nika patut iraga laksanayang napi ten, pikayunan iraga pastika prasida ngebinayang. Mangkin yening tetembangan ring masyarakat sampun ten manut napike iraga tetep mirengang utawi nembangang? Sampun galahe mangkin iraga dados jadma Bali nganggen warisan budaya anggen ngasorang tembang-tembang ten becik punika. Geguritan, kidung, lan kekawin sane sarat ajaran agama sujatine sampun wenten ring masyarakat lan iraga wantah harus ngangkat eksistensinyane.

          Nglestariang sastra tembang pacang ngamolihang pikenoh sane luih. Nilai-nilai agama sane wenten drika patut pesan dados panutan iraga ngamarginin zaman Globalisasi mangda prasida ngelawan dampak negatifnyane. Para leluhur iraga dumun ngaryanin sastra tembang puniki maka utsaha mangda para jadmane polih peplajahan sane luhur mautama. Pinih becik iraga nglestariang kawentenan warisan budaya puniki tekening yening iraga nglestariang tembang-tembang mangkin sane ten maguna. Mangda nenten ngawinang para leluhur iraga tedun ka jagate lan nikaang iraga melajah malih matembang sane becik. Yen misalne sekadi nika, juari napi ten yening sang saking niskala ngorain iraga?

Artikel Mabasa Bali: Ngewaspadain Tembang-Tembang Illuminati

Artikel puniki dados ka-copy nanging elingang nagingin alamat blog puniki

Ngewaspadain Tembang-Tembang Illumunati

        

            Wau-wau niki penyanyi internasional Ke$ha ngewetuang video klip teranyarnyane sane majudul “Die Young”. Tembang sane sarat unsur genre electropop niki polih uratian khusus saking penikmat musik internasional antuk kontroversinyane. Ke$ha nagingin unsur-usur seksualitas lan Illuminati ring video ipun minakadi lambang segitiga sane akeh, lambang salib sane mabading, lan pose nekepin penyingakan asiki. Siosan teken Ke$ha, akeh malih musisi dunia sane nganggen lambang Illuminati lan lambang ajaran sesat ring video klipnyane minakadi Lady Gaga ring video “Judas”, Shinee ring video “Lucifer”, Rihanna ring video “Umbrella”, miwah sane siosan. Para musisi punika maprakarsa yening simbol-simbol ajaran sesat ring video klip druene wantah sewates seni.

          Ngenenin indik istilah Illuminati, kantun kidik masyarakate sane uning. Illuminati punika pupulan jadma rahasia sane kabaosang maktinin kala lan sang sane magabung pacang ngemangguhin kesuksesan. Mangkin industri musik internasional sampun akeh sane kawarnain pralambang Illuminati. Ring Indonesia mangkin sampun akeh tembang sane kacurigain madue unsur Illuminati punika. Tetujon kawentenan unsur Illuminati ring sajeroning tembang punika ten wenten sane tatas uning. Menawi ke nika mangda ajaran Illuminati mesebar.

          Nguratiang tembang-tembang hiburan ring masyarakat sane sayan kadagingin unsur-unsur ten manut ring agama, sampun galahne mangkin mawali ngangkat tembang sastra sane madue kaluihan. Sastra tembang Bali minakadi geguritan, kidung, lan kekawin nika pinih becik yening kasaihang olih tembang-tembang mangkin sane kawastanin aor tanpa wates. Satra tembang punika patut pesan katembangang mawinan ipun madaging nilai-nilai agama sane becik anggen panutan. Kawentenan sastra tembang puniki mangda setata kalestariang lan nenten kakasorang olih tembang-tembange mangkin sane ten becik punika.

          Utsaha ngelestariang sastra tembang menawi pacang ngamolihang pikobet. Satra tembang punika ten malih setinut ring penglimbakan selera masyarakat sekadi mangkin. Tembang mangkin sane katrima wantah tembang sane bergenre “asyik” yadiastun ipun ngeranjing ring soroh tembang Illuminati. Kramane mangkin ten nguratiang kehanan tembang sane becik lan ten becik. Perlu pesan utsaha-utsaha ekstra mangda  sastra tembang nika eksis ring masyarakat sane ngawinang mangda  sastra tembang nika ajeg lan prasida ngasorang tembang-tembang Illuminati napi malih ngicalang tembang-tembang ten becik punika.

Olih: I Made Wisnawa

Artikel Mabasa Bali: Indik Utsawa Dharma Gita (artikel terjemahan saking internet)

            Artikel puniki tityang polih saking internet lan katerjemahang, dados ka-copy nanging elingang nagingin alamat blog puniki

Indik Utsawa Dharma Gita

Manut kitab suci Veda, Utsawa Dharma Gita nika inggih punika nyangkup ; Phalasruti, Phalasloka, lan Phalakwaya. Phalasruti madue makna pahala sane kapolihang saking ngwacen kitab-kitab sruti utawi wahyu sane lumrah kabaos  mantra sane kaicen olih Hyang Widhi. Phalasloka inggih punika pahala sane kapolihang saking ngwacen kitab-kitab susastra Hindu minakadi kitab Itihasa, sekadi Ramayana utawi Mahabrata. Phalawakya inggih punika tradisi ngewacen  karya sastra Jawa Kuno marupa prosa utawi parva. Sane mangkin Utsawa Dharma Gita punika kabaos pacentokan utawi festival nembangang sastra tembang suci keagamaan. Utsawa maarti festival utawi pacentokan lan Dharma Gita punika sastra tembang suci keagamaan.

Utsawa Dharma Gita sekadi kidung suci keagamaan Hindu sampun sue nglimbak  ring masyarakat saking makudang-kudang pesantian sane wenten ring Bali utawi luar Bali. Sadurung dados even nasional, Utsawa Dharma Gita kalaksanayang Pemda Bali marupa pacentokan kekawin lan kidung. Kawigunan Dharma Gita ring sajeroning kegiatan keagamaan mawantu pesan nyiptayang kehanan sane hening, hikmat/kusuk sane satinut getaran kesucian saking soroh yadnya sane kalaksanayang. Maka utsaha nglestariang miwah nglimbakang Dharma Gita ring masyarakat, Utsawa Dharma Gita kaupayaang mangda setata malaksana tigang warsa apisan.

       Utsawa Dharma Gita punika sampun sukses mamargi lan kalaksanayang ring makudang-kudang genah. Pelaksanaan Utsawa Dharma Gita punika minakadi:

1.Utsawa Dhama Gita tingkat nasional kaping pertama kalaksanayang ring Denpasar, Bali duk warsa 1978.

2.Utsawa Dharma Gita II ring Denpasar duk warsa 1979.

3.Utsawa Dharma Gita III malih kalaksanayang ring Denpasar duk 1980.

4.Utsawa Dharma Gita Tingkat Nasional IV kalaksanayang ring Taman Mini Indonesia Indah (TMII) Jakarta duk warsa 1991.

5.Utsawa Dharma Gita Tingkat Nasional V kalaksanayang ring Solo-Surakarta, Jawa Tengah, duk warsa 1993.

6.Utsawa Dharma Gita Tingkat Nasional VI ring Palangkaraya, Kalimantan Tengah duk 1996.

7. Utsawa Dharma Gita Tingkat Nasional VII kalaksanayang malih ring Taman Mini Indonesia Indah (TMII) Jakarta duk warsa 2000.

8. Utsawa Dharma Gita Tingkat Nasional VIII kalaksanayang ring Mataram, Nusa Tenggara Barat duk 2002.

9. Utsawa Dharma Gita Tingkat Nasional IX kalaksanayang ring Bandar Lampung, Lampung duk 2005.

Utsawa Dharma Gita puniki tetep mamargi ngantos mangkin. Dumogi kawekas even sekadi niki sayan nglimbak ring masyarakat.

Olih: I Made Wisnawa

Artikel Mabasa Bali: Sastra Tembang, Lagu Lawas Sane Nembangang Kaluihan

            Artikel puniki dados ka-copy nanging elingang nagingin alamat blog puniki

Sastra Tembang, Lagu Lawas Sane Nembangang Kaluihan

Ilmu Pengetahuan dan Tekonologi (IPTEK) punika boya ja sios wantah sarana sane kaciptayang olih I Manusa maka utsaha ngemudahang ring sajeroning pekaryan. Sekancan piranti canggih punika sujatinnyane wantah keanggen nulungin ritatkala iraga molihang pikobet ring makudang-kudang wewidangan. Widang pertanian, kesehatan, ekonomi, pendidikan, miwah widang-widang sane lianan nika makasami mangkin merluang pesan napi sane kawastanin teknologi. Kawentenan piranti teknologi canggih mangkin sekadi oong ring masan sabeh, akeh pisan. Kelih cerik, lanang wadon, makasami mangkin sampun naanin kawentenan piranti teknologi ring kehidupan sehari-hari. IPTEK punika mangkin sampun nyangkup samian krama lan prasida kapolihang ring sekancan genah. Mula saja IPTEK ring aab jagate sekadi mangkin sane kawastanin zaman globalisasi punika sampun dados kebutuhan utama.

IPTEK sane sayan nglimbak punika sekadi lemat mamata kalih. Ring sisi niki madue pikenoh becik nanging ring sisi lianan madue sekancan iusan kaon. Teknologi mangkin sampun kasalahgunaaang olih I Manusa kaanggen madaya corah lan mabuat sane ngawinang ten manut ring sesana. Pornografi, penipuan, pembajakan, nika wantah akidik conto tingkah laku sane kaawinang olih dampak negatif globalisasi. Soleh, tingkah ten becik punika mangkin sampun sayan nglimbak setinut ring teknologi sane taler sayan nglimbak. Satmaka jagate mangkin sampun aor tanpa wates. Kehanan jagate sekadi mangkin minab sampun ngengsekin manah mawinan tingkah I Manusa sayan nampekin tingkah buron.

Iusan kaon saking globalisasi punika masih ngerus sekancan nilai-nilai tradisional. Makudang-kudang warisan budaya mangkin sayan kidik saka kidik kakasorang olih piranti teknologi canggih. Ring Bali wenten makudang-kudang seni sane sayan ical minakadi seni suara utawi tembang. Dumun sastra tembang puniki dados hiburan nanging mangkin wantah kaanggap lagu lawas. Hiburan sane mangkin punika sekadi ring televisi ten wenten sane ngangkat sastra tembang minakadi kekawin, kidung, lan geguritan. Ring BaliTV nika jakti wenten, nanging penontonnyane kari kidik. Minab mangkin tembang pop, dangdut, rock, R&B, miwah sane siosan dados konsumsi masyarakat ngentosin sastra tembang punika.

Sujatinne yening uratiang mangkin tembang-tembang hiburan punika sampun aor liriknyane lan madue cerita sane nenten becik. Tembang-tembang pop bali sane lirik utawi video klipnyane ten becik inggih punika “Meli Sambuk di Dawan” olih Dek Ulik,  “Pak Dokter” olih Trio Kirani, miwah sane siosan. Yening tembang Indonesia minakadi “Ku Hamil Duluan” olih Tuti Wibowo, “Keong Racun” olih Lissa, “Lakukan Dengan Cinta” olih Mahadewi, miwah sane siosan. Lan tembang-tembang Internasional masih akeh sane kenten. Mangkin ring tembang intenasional, video klip lan liriknyane boya ja madue unsur pornografi kemanten nanging madue ajakan nyembah kala. Kewentenan video klip sane ngajakin nyembah kala utawi ajaran Illuminati mangkin dados bahan pembicaraan hangat ring negara-negara barat. Tembang punika minakadi “Judas” olih Lady Gaga, “S&M” olih Rihanna, lan sane terang-terangan nyihnayang illuminati punika ring tembang “Die Young” olih Ke$ha sekadi sane kabaosang olih Kapanlagi.com.

Yening kawentenan tembange sekadi mangkin tetep nyihnayang kajelean, sinah pacang ngawinang degradasi moral ring sajeroning krama khususnyane para yowana. Kramane mangkin akeh utawi kidik sampun keni iusan kaon saking tembang-tembang hiburan. Minab sampun galahe mangkin ngangkat sastra tembang mangda populer ring masyarakat. Sastra tembang ring sajeroning krama Bali punika akeh pesan. Sastra tembang punika boya ja sewates lirik-lirik tanpa arti nanging madue sekancan peplajahan idup sane keanggen panutan. Nilai-nilai agama ring sastra tembang punika patut pesan  anggen panutan mangda ngemarginin urip sane becik. Nilai-nilai positif sekadi punika pastika sukeh pisan kapolihang saking tembang hiburan di masyarakat sane mangkin.

Ngenenin indik kabecikan sastra tembang, nglestariang sastra tembang punika dados masih keanggen nyuaraang utsaha pemerintah ngewentuk pendidikan karakter bangsa. Sane mangkin pemerintah sampun gencar nyuaraang pendidikan berbasis karakter bangsa maka utsaha natasin parisolah jadmane sane sumingkin nyihnayang kajelean. Wenten 18 nilai ring sajeroning upaya nglimbakang pendidikan budaya lan karakter bangsa sane kawetuang olih Kemdikbud. 18 nilai punika minakadi:

 1. Religius
 2. Jujur.
3. Toleransi
4. Disiplin
5. Kerja Keras
6. Kreatif. 
7. Mandiri
8. Demokratis
9. Rasa Ingin Tahu
10. Semangat Kebangsaan
11. Cinta Tanah Air
12. Menghargai Prestasi
13. Bersahabat/Komunikatif
14. Cinta Damai
15. Gemar Membaca
16. Peduli Lingkungan
17. Peduli Sosial                                                                                                        18. Tanggung Jawab. Sumber: http://www.menkokesra.go.id (Kemdikbud/Gs).

Sastra tembang sane madue nilai-nilai luhur pastika maguna pesan ring utsaha nyuksesang pendidikan berbudaya lan berkarakter. Nanging eksistensinyane ring masyarakat kantun kirang. Nglestariang sastra tembang ring aab globalisasi punika sekadi ulam ring tengahing tukad, meled ipun ka ulu nanging arus toyane sayan ngedeng ka teben. Meled manah iraga nglestariang  sastra tembang nanging arus globalisasi ten prasida kakasorang. Yening sekadi punika, lan margiang utsaha nglestariang budaya berbasis teknologi. Utsaha-utsaha punika sekadi ngaryanin website sane nagingin sastra tembang. Mangkin utsaha puniki kabaos efektif pesan lan sampun akeh sane ngelaksanayang. Yening sastra tembang Bali katelusurin di Google pacang ngewetuang kirang langkung 120.000 hasil. Wilangan sane asapunika sampun kawastanin becik pesan. Dumogi utsaha-utsaha sekadi niki sayan akeh mangda dampak negatif globalisasi dados kakasorang lan utsaha pewangunan karakter bangsa ngamolihang kasuksesan.

Olih: I Made Wisnawa